De kreake út 1554 is it pronkstik fan de Eastereiner tsjerke. Foar de restauraasje wie dy sawol oan de boppe- as de ûnderkant fan de efterside (de koarside) tichtmakke. Der wie in dúdlike skieding tusken de 'foartsjerke' (de koarromte út de tiid doe 't de tsjerke noch RK wie) en de 'tsjerkeseal'. Nei de restauraasje foarmet de kreake wer ien gehiel mei koar en skip fan de tsjerke.

Dizze fotorige hat as doel sjen te litten hoe 't it gehiel der foar- en nei de restauraasje útseach. Yn it ûnderdiel oer de Tsjerke wurdt mear ynhâldlik op de kreake (it doksaal) yngongen.

De Koaifinne hat 11 adressen. Der steane 7 frijsteande wenningen en twa dûbele wenningen. It binne allegearre keapwenten. Sboud yn de perioade om 1977 - 1980 hinne. By de foto's stiet neamd wa't wenne hawwe en no wûnen. De Koaifinne foarmet mei it Smidslân in buert. 

De namme Koaifinne komt fan it perseel lân by de pleats fan C. Agricola. Yntusken is dizze pleats oernaam troch de maatskip Kuiper. De pleats leit oan it binnenpaad fan Easterein nei Reahûs. Op neamd perseel wie eartiids in einekoai. 

De foto is yn de begjinjierren nei de bou makke. Sije en Gerritje Zwerver, kuierje troch de nijbou.

It Dobbelân tanket syn namme oan de Dobbe. It is in natuerlike boarne dy't miskien wol 1000 jier âld is. De Dobbe hat in djipte fan 7 meter oant de sânboaiem. Dêr komt it swiete wetter omheech. It waard yn drûge perioaden brûkt troch de lytse doarpsboeren foar wetter foar de bisten. 

It is bysûnder dat de Dobbe yn it bestimmingsplan fan de bou fan de wenningen opnaam is. 

De wenningen binne boud as hierwenten fan de Wenningboustichting, no Elkien. Yn de rin fan de jierren binne der in oantal ferkocht. It is no in miks fan keap en hier wenten.

It brânwachthok is yn opdracht fan de Tsjerkfâlden boud op it achterhiem fan it Café, Herberg en Trochreed om de brânspuit in better plak te jaan as by de tsjerke. De ferantwurdlikheid foar de brânwacht lei dus by de tsjerkfâdij. En dat is bysûnder om't op de measte doarpen dizze taak by de gemeente lei. 

Yn it finster in byld fan de spuit en fan de stalling. Neist foto's binne der ek twa dokuminten oan dit finster tafoege.

De Streek is in smelle strjitte yn it ferlingde fan de doarpskom. De strjitte leit tusken de wynserfeart en de doarpsfeart en waard troch in heechhout ûntslúten.  It earste hûs, no nûmer 12 stie der al yn 1830 en is ien fan de âldste húzen fan it doarp. De measte huzen binne fan 1850-1900 boud. Yn de strjitte wiene eartiids in protte winkeltsjes. It heechhout is yn 1910 ferfongen troch in izeren wipbrêge. Oan it ein fan de strjitte rûn in rinpaad lâns de wynserfeart.